اكتبلي شماردت تكتب ورد الك
ازعل وابتعد وامشي وارد لك
بساتين بوسط الكلب زرعت ورد لك
عزيز وغالي تبقى عليه
اريد افرمت كلبي والغي رامه
واشيل العشك منه والغي رامه
عليك انت المخطط والغرامه
لان حسنك كسر غفله عليه
تعال احسب بهمي عده انته
وگلبي شعده غيرك عده انته
ازعل الدنيه كلهه عده انته
لأن زعلك يزعلني عليه
ياهل تنشدعلى حالي تراني
ابد ما يستوي وكتي ترى ني
صحيح الناس متهندم تراني
لجن نيران البگلبي سريه
بعد موصل لعد دارك وطبها
يالناسي دوه جروحي وطبها
بدساتير العشك احلف وطبها
نارك للعطاشة ابغير مية
قلبي انت ملكته وانت حر بيه
عليل وطبي عندك وانت حر بيه
كاس السم اشربه وانتحر بيه
اذا غيرك يمس اطراف ادية
أذا لجلك فديت الروح مندم
عليك العين تهمل دمع مندم
أذا عمري كظيته وياك مندم
لأن طبعك حلو ونفسك أبيه
انا من هام بودادك وجن بيك
نهاري ليل من فركك وجن بيك
بغيابك راحن افكاري واجن بيك
يمن شوفتك عيد يصير اليه
گلبي الچان الك مسكن والك دار
بجفاك الحزن شل حالي والك دار
الوكت دولاب مل مني والك دار
وانت والوكت صرتو عليه
هلي وياهم چنت عايش بلاهم
ونهاري شماضوى مظلم بلاهم
هلي مدري الوكت شنهو بلاهم
ولاهم اعرفوا بالصار بيه
انا بنار الاشواك احتر وصلي
وياك ابد ماينكطع وصلي
اذا انت اجاك الموت وصلي
انتحر كبلك وشيلتنة سوية
دمك يحلو الطول عسل منحل
تعال وشوف جسمي العلي منحل
اتاني بالمدرسه واشوف منحل
خلص وكت الدوام شلون بيه
الك ياصاح ماظل مني خاطر
واحسبه احساب دربك من اخاطر
تعال كرب حبيبي مني خاطر
تعرف اجنون حبك اسوه بيه
عشرتك روحــي صَـــــــــدگ .. ماتملها
وگلبي ايــــــــــام سعـــــــدك .. ماتملها
اريد انصــــب لروحــــــــــي .. مأتم الها
واشوفك هم تجي وتبچي عليه ؟
كَلبي بتده بحبك وانتَ هاله
وتنوح الروح لجلك وانتَ هاله
الكَمر للناس يضوي وانتَ هاله
تضوي للكَمر لو خفت ضيه
انا بگاروك حبك وانته هزني
صرت فرصه بحياتك وانتهزني
انه شجره محبتك وانته هزني
وخلي الورد يتناثر عليه
حبيبي لاتشد راسك سلامات
عدوك من دره بحالك سلا اومات
الف مكتوب لبعثلك او سلامات
عزيز او يصعب افراكك عليه
سكنت بكلبي لاتكلي ماساكن
وترة كلش خطية احنة مساكين
انة احجز غرف كلبك مساكن
واظل ساكن بكلبك للمنيه
زماني وياي ما انصف بجيله
ولج ياعين بسج عاد بجيله
حبيبي اشلون صوبني بجيله
زرف كلبي وكف شامت عليه
ان شاء الله تعجبكم
مع تحياتي
tmara
الرئيسية 
التسجيل 
دخول 
23/09/07, 12:21 am